21 ਦਿਨਾਂ ਤੋਂ ਸੁਰੰਗ ‘ਚ ਫਸੇ ਮਜ਼ਦੂਰ…ਬਚਾਅ ਕਾਰਜਾਂ ਨੂੰ ਤੇਜ਼ ਕਰਨ ਲਈ ਕੰਮ ਕਰ ਰਹੇ ਹਨ ਰੋਬੋਟ

ਨਾਗਰਕੁਰਨੂਲ- ਤੇਲੰਗਾਨਾ ਵਿਚ 21 ਦਿਨ ਬਾਅਦ ਵੀ ਐਸਐਲਬੀਸੀ ਸੁਰੰਗ ਦੇ ਅੰਦਰ ਫਸੇ ਸੱਤ ਲੋਕਾਂ ਦੀ ਭਾਲ ਜਾਰੀ ਹੈ। ਲੋਕਾਂ ਦੀ ਭਾਲ ਲਈ ਵਿਸ਼ੇਸ਼ ਮਸ਼ੀਨਰੀ ਨਾਲ ਲੈਸ ਇਕ ‘ਸਵਾਯਤ ਹਾਈਡ੍ਰੌਲਿਕ ਸੰਚਾਲਿਤ ਰੋਬੋਟ’ ਤਾਇਨਾਤ ਕੀਤਾ ਗਿਆ ਹੈ। ਉਮੀਦ ਹੈ ਕਿ ਜਲਦੀ ਹੀ ਉਨ੍ਹਾਂ ਨੂੰ ਬਾਹਰ ਕੱਢ ਲਿਆ ਜਾਵੇਗਾ।

ਇਕ ਅਧਿਕਾਰਤ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਉਪਕਰਣਾਂ ਵਿਚ 30 ਐਚ.ਪੀ. ਸਮਰੱਥਾ ਵਾਲਾ ਲਿਕਵਿਡ ਰਿੰਗ ਵੈਕਿਊਮ ਪੰਪ ਅਤੇ ਇਕ ਵੈਕਿਊਮ ਟੈਂਕ ਮਸ਼ੀਨ ਸ਼ਾਮਲ ਹੈ, ਜੋ ਸੁਰੰਗ ਦੇ ਅੰਦਰ ਮਿੱਟੀ ਨੂੰ ਤੇਜ਼ੀ ਨਾਲ ਹਟਾਉਣ ਅਤੇ ਹੋਰ ਕੰਮਾਂ ਵਿਚ ਸਹਾਇਕ ਹੈ। ਮਿੱਟੀ ਨੂੰ ਤੇਜ਼ੀ ਨਾਲ ਹਟਾਉਣ ਲਈ ਮੈਨੂਅਲ ਖੁਦਾਈ ਦੀ ਥਾਂ, ਸਵਾਯਤ ਹਾਈਡ੍ਰੌਲਿਕ-ਸੰਚਾਲਿਤ ਰੋਬੋਟ ਦਾ ਉਪਯੋਗ ਕੀਤਾ ਜਾ ਰਿਹਾ ਹੈ।

ਬਿਆਨ ਮੁਤਾਬਕ, ਕਨਵੇਅਰ ਬੈਲਟ ਦੀ ਵਰਤੋਂ ਕਰਕੇ ਇਕ ਘੰਟੇ ਵਿਚ ਲਗਪਗ 620 ਕਿਊਬਿਕ ਮੀਟਰ ਮਿੱਟੀ ਅਤੇ ਮਲਬੇ ਨੂੰ ਸੁਰੰਗ ਤੋਂ ਬਾਹਰ ਕੱਢਿਆ ਜਾ ਸਕਦਾ ਹੈ। ਨਵੀਨਤਮ ਤਕਨੀਕ ਵਾਲੀਆਂ ਮਸ਼ੀਨਾਂ ਦੇ ਉਪਯੋਗ ਨਾਲ ਓਪਰੇਸ਼ਨ ਨੂੰ ਕੁਸ਼ਲਤਾਪੂਰਵਕ ਕਰਨ ਵਿਚ ਮਦਦ ਮਿਲੇਗੀ। ਰਾਜ ਦੇ ਵਿਸ਼ੇਸ਼ ਮੁੱਖ ਸਕੱਤਰ ਅਰਵਿੰਦ ਕੁਮਾਰ ਭਾਲ ਮੁਹਿੰਮ ਦੀ ਨਿਗਰਾਨੀ ਕਰ ਰਹੇ ਹਨ।

ਇਸ ਤੋਂ ਪਹਿਲਾਂ ਦਿਨ ਵਿੱਚ, ਮੁਹਿੰਮ ਵਿਚ ਸ਼ਾਮਲ ਵੱਖ-ਵੱਖ ਸੰਸਥਾਵਾਂ ਦੇ ਕਰਮਚਾਰੀ ਜ਼ਰੂਰੀ ਉਪਕਰਣ ਲੈ ਕੇ ਸੁਰੰਗ ਦੇ ਅੰਦਰ ਗਏ। ਸਰਕਾਰੀ ਖਣਨ ਕੰਪਨੀ ‘ਸਿੰਗਰੇਨੀ ਕੋਲਿਯਰੀਜ਼’ ਦੇ ਬਚਾਅ ਕਰਮਚਾਰੀ, ਲਾਪਤਾ ਵਿਅਕਤੀਆਂ ਦੀ ਭਾਲ ਲਈ ਖਣੀਕਾਂ ਦੇ ਨਾਲ ਮਿਲ ਕੇ ਥਾਵਾਂ ‘ਤੇ ਖੁਦਾਈ ਕਰ ਰਹੇ ਹਨ।

ਤੇਲੰਗਾਨਾ ਸਰਕਾਰ ਨੇ ਬਚਾਅ ਕਰਮਚਾਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਰੋਬੋਟ ਤਾਇਨਾਤ ਕਰਨ ਦਾ ਫੈਸਲਾ ਕੀਤਾ ਹੈ। ਸੁਰੰਗ ਅੰਦਰ ਪਾਣੀ ਅਤੇ ਚਿੱਕੜ ਸਮੇਤ ਚੁਣੌਤੀਪੂਰਨ ਹਾਲਾਤਾਂ ਕਾਰਨ ਕਾਫੀ ਖ਼ਤਰਾ ਰਹਿੰਦਾ ਹੈ। ਬਚਾਅ ਕਰਮਚਾਰੀਆਂ ਨੇ ਕੁੱਤਿਆਂ ਦੁਆਰਾ ਦੱਸੇ ਗਏ ਥਾਵਾਂ ‘ਤੇ ਖੁਦਾਈ ਕੀਤੀ। ਕੇਰਲ ਪੁਲਿਸ ਦੇ ਬੈਲਜੀਅਨ ਮੈਲਿਨੋਇਸ ਨਸਲ ਦੇ ਕੁੱਤੇ 15 ਫੁੱਟ ਦੀ ਗਹਿਰਾਈ ਤੱਕ ਗੰਧ ਪਛਾਣਣ ਵਿਚ ਸਮਰੱਥ ਹਨ।

ਸੈਨਾ, ਐਨ.ਡੀ.ਆਰ.ਐਫ., ਐਸ.ਡੀ.ਆਰ.ਐਫ., ਐਚ.ਆਰ.ਡੀ.ਡੀ. (ਮਾਨਵ ਅਵਸ਼ੇਸ਼ ਖੋਜੀ ਕੁੱਤੇ, ਸਰਕਾਰੀ ਖਣਨ ਕੰਪਨੀ ਸਿੰਗਰੇਨੀ ਕੋਲਿਯਰੀਜ਼, ਹੈਦਰਾਬਾਦ ਸਥਿਤ ਰੋਬੋਟਿਕਸ ਕੰਪਨੀ ਅਤੇ ਹੋਰ) ਦੀਆਂ ਟੀਮਾਂ ਇਸ ਮੁਹਿੰਮ ਵਿਚ ਸਰਗਰਮ ਤੌਰ ‘ਤੇ ਸ਼ਾਮਲ ਹਨ। ਟਨਲ ਬੋਰਿੰਗ ਮਸ਼ੀਨ (ਟੀ.ਬੀ.ਐਮ.) ਓਪਰੇਟਰ ਦੇ ਤੌਰ ‘ਤੇ ਕੰਮ ਕਰਨ ਵਾਲੇ ਗੁਰਪ੍ਰੀਤ ਸਿੰਘ ਦੀ ਲਾਸ਼ 9 ਮਾਰਚ ਨੂੰ ਬਰਾਮਦ ਕੀਤੀ ਗਈ ਸੀ। ਲਾਸ਼ ਨੂੰ ਪੰਜਾਬ ਵਿਚ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸੌਂਪ ਦਿੱਤਾ ਗਿਆ।

ਗੁਰਪ੍ਰੀਤ ਸਿੰਘ ਦੇ ਇਲਾਵਾ, ਸੱਤ ਹੋਰ ਲੋਕ ਅਜੇ ਵੀ ਫਸੇ ਹੋਏ ਹਨ ਜਿਨ੍ਹਾਂ ਵਿਚ ਮਨੋਜ ਕੁਮਾਰ (ਉੱਤਰ ਪ੍ਰਦੇਸ਼), ਸਨੀ ਸਿੰਘ (ਜੰਮੂ ਅਤੇ ਕਸ਼ਮੀਰ), ਗੁਰਪ੍ਰੀਤ ਸਿੰਘ (ਪੰਜਾਬ) ਅਤੇ ਸੰਦੀਪ ਸਾਹੂ, ਜੇਗਤਾ ਜੇਸ ਅਤੇ ਅਨੁਜ ਸਾਹੂ ਸ਼ਾਮਲ ਹਨ, ਜੋ ਸਾਰੇ ਝਾਰਖੰਡ ਦੇ ਹਨ। 22 ਫਰਵਰੀ ਨੂੰ ਐਸ.ਐਲ.ਬੀ.ਸੀ. ਪ੍ਰੋਜੈਕਟ ਦੀ ਸੁਰੰਗ ਦਾ ਇਕ ਹਿੱਸਾ ਢਹਿ ਜਾਣ ਤੋਂ ਬਾਅਦ ਅੱਠ ਲੋਕ – ਜਿਨ੍ਹਾਂ ਵਿਚ ਇੰਜੀਨੀਅਰ ਅਤੇ ਮਜ਼ਦੂਰ ਸ਼ਾਮਲ ਹਨ, ਉਹ ਸਾਰੇ ਫਸ ਗਏ ਸਨ।