ਸਾਂਝੇ ਅਧਿਆਪਕ ਮੋਰਚੇ ਪੰਜਾਬ ਵੱਲੋਂ ਡੀਪੀਆਈ (ਸੈਕੰਡਰੀ )ਨਾਲ ਅਧਿਆਪਕ ਮਸਲਿਆਂ ਤੇ ਭਰਵੀ ਮੀਟਿੰਗ ।

ਐਸ ਏ ਐਸ ਨਗਰ,24 ਜੂਨ( ਅਮ੍ਰਿਤਪਾਲ ਸਿੰਘ ਸਫਰੀ)ਸਾਂਝਾ ਅਧਿਆਪਕ ਮੋਰਚਾ ਪੰਜਾਬ ਦੀ ਸਿੱਖਿਆ ਮੰਤਰੀ ਨਾਲ ਪੰਜਾਬ ਸਿਵਿਲ ਸਕੱਤਰੇਤ ਚੰਡੀਗੜ੍ਹ ਵਿਖੇ 15 ਜੂਨ ਨੂੰ ਹੋਈ ਮੀਟਿੰਗ ਦੀ ਲਗਾਤਾਰਤਾ ਵਿੱਚ ਡੀ ਪੀ ਆਈ (ਸੈ. ਸਿੱ.) ਅਤੇ ਏ ਡੀ ਪੀ ਆਈ (ਐ. ਸਿੱ) ਨਾਲ ਅਧਿਆਪਕਾਂ, ਵਿਦਿਆਰਥੀਆਂ ਅਤੇ ਸਕੂਲਾਂ ਦੇ ਹੋਰਨਾਂ ਮਸਲਿਆਂ ਸਮੇਤ ਡੀਪੀਆਈ ਦਫਤਰ ਵਿਖੇ ਮੀਟਿੰਗ ਹੋਈ।ਅਧਿਆਪਕ ਮੋਰਚੇ ਦੇ ਆਗੂਆਂ ਨੇ ਦੱਸਿਆ ਕਿ ਸੰਘਰਸ਼ੀ ਅਧਿਆਪਕਾਂ ਦੀਆਂ ਹਰ ਤਰ੍ਹਾਂ ਦੀਆਂ ਵਿਕਟੇਮਾਈਜੇਸ਼ਨਾਂ, ਪੁਲਿਸ ਕੇਸ, ਆਦਰਸ਼ ਸਕੂਲਾਂ (ਪੀ ਪੀ ਪੀ ਮੋਡ) ਦੇ ਅਧਿਆਪਕਾਂ ਦੀਆਂ ਟਰਮੀਨੇਸ਼ਨਾਂ ਸਮੇਤ 8886 ਦੇ ਰਹਿੰਦੇ ਰੈਗੂਲਰ ਆਰਡਰ ਜਾਰੀ ਕਰਵਾਉਣ ਦੀ ਕਾਰਵਾਈ ਤੇਜ ਕਰਨ ਸਬੰਧੀ ਵਿਸਥਾਰ ਵਿੱਚ ਚਰਚਾ ਕੀਤੀ ਗਈ। ਸਾਥੀ ਬਲਕਾਰ ਵਲਟੋਹਾ ਦੀ ਅਪੀਲ ਸਿੱਖਿਆ ਮੰਤਰੀ ਦਫ਼ਤਰ ਪਹੁੰਚਾਉਣ ਅਤੇ ਹਰਿੰਦਰ ਸਿੰਘ ਦੇ ਰੈਗੂਲਰ ਆਰਡਰ ਜਲਦ ਕਰਨ ਦੀ ਹਦਾਇਤ ਮੌਕੇ ‘ਤੇ ਕੀਤੀ ਗਈ। ਮੈਡਮ ਨਵਲਦੀਪ ਵਲੋਂ ਸਿੱਧੀ ਭਰਤੀ ਰਾਹੀਂ ਹੈਡ ਮਿਸਟ੍ਰੈਸ ਦੇ ਅਹੁਦੇ ‘ਤੇ ਬਣੇ ਰਹਿਣ ਦੀ ਸਹਿਮਤੀ ਅਧਿਕਾਰੀਆਂ ਨੂੰ ਦੇਣ ਦੀ ਜਾਣਕਾਰੀ ਦਿੱਤੀ ਗਈ। ਵਿਭਾਗ ਵਲੋਂ ਵਿਕਟੇਮਾਈਜ਼ ਅਧਿਆਪਕਾਂ ਅਤੇ ਪੁਲਿਸ ਕੇਸਾਂ ਸਬੰਧੀ ਮੌਜੂਦਾ ਸਥਿਤੀ ਦੀ ਜਾਣਕਾਰੀ ਮੋਰਚੇ ਤੋਂ ਮੰਗੀ ਗਈ ਹੈ। ਹਰ ਵਰਗ ਦੀਆਂ ਪ੍ਰਮੋਸ਼ਨਾਂ 75:25 ਅਨੁਪਾਤ ਨਾਲ ਜਲਦ ਕਰਨ ਲਈ ਹੋ ਰਹੀ ਕਾਰਵਾਈ ਤੇਜ ਕਰਨ ਦੀ ਮੰਗ ਕੀਤੀ ਗਈ। ਇਸ ਸਬੰਧੀ ਨਿਯਮਾਂ ਦੀ ਬਹਾਲੀ ਲਈ ਸਰਕਾਰ ਨਾਲ ਸਬੰਧਤ ਕਾਰਵਾਈ ਸ਼ੁਰੂ ਕੀਤੀ ਗਈ। ਸੀ ਐਂਡ ਵੀ ਕਾਡਰ ਦੀ ਘੱਟੋ ਘੱਟ ਯੋਗਤਾ, ਕੋਰਸ ਦੀ ਯੋਗਤਾ ਅਨੁਸਾਰ ਕਰਨ ਦੀ ਮੰਗ ਤਰਕਪੂਰਨ ਢੰਗ ਨਾਲ ਰੱਖਣ ‘ਤੇ ਵਿਚਾਰਨ ਦਾ ਭਰੋਸਾ ਦਿੱਤਾ ਗਿਆ। ਹਰ ਅਧਿਆਪਕ ਨੂੰ ਬਦਲੀ ਕਰਵਾਉਣ ਦਾ ਹੱਕ ਦੇਣ ਦੀ ਮੰਗ ਕੀਤੀ ਗਈ। ਮੋਰਚੇ ਵਲੋਂ ਬਦਲੀਆਂ ਸਬੰਧੀ ਦਿੱਤੇ ਗਏ ਸੁਝਾਵਾਂ ‘ਤੇ ਕਾਰਵਾਈ ਅਮਲ ਵਿੱਚ ਲਿਆਉਣ ਅਤੇ ਸਾਰੀਆਂ ਪੋਸਟਾਂ ਸਕੂਲ ਪੱਧਰ ਤੇ ਦਰਸਾਉਣ ਬਾਰੇ ਸੂਚਨਾ ਦਿੱਤੀ ਗਈ।ਐਸ ਐਲ ਏ ਦੀ ਪੋਸਟ ਦਾ ਨਾਂ ਬਦਲਣ ਸਬੰਧੀ ਕੀਤੀ ਜਾ ਰਹੀ ਕਾਰਵਾਈ ਦੀ ਜਾਣਕਾਰੀ ਦਿੱਤੀ ਗਈ। ਘੱਟੋ ਘੱਟ 15 ਦਿਨ ਦੀ ਮੈਡੀਕਲ ਛੁੱਟੀ ਦੀ ਸ਼ਰਤ ਰੱਦ ਕਰਕੇ ਅਧਿਆਪਕਾਂ ਵਾਂਗ ਲਾਗੂ ਕਰਨ ਦੀ ਕਾਰਵਾਈ ਆਰੰਭੀ ਗਈ। ਹਰ ਕਿਸਮ ਦੀ ਛੁੱਟੀ ਆਨ ਲਾਈਨ ਅਪਲਾਈ ਕਰਨ ਦੀ ਸ਼ਰਤ ਰੱਦ ਕਰਕੇ ਸਕੂਲ ਪੱਧਰ ‘ਤੇ ਅਧਿਕਾਰ ਦੇਣ ਦੀ ਮੰਗ ਵਿਚਾਰਨ ਦਾ ਭਰੋਸਾ ਦਿੱਤਾ ਗਿਆ। ਪੀ ਐਫ ਐਮ ਐਸ ਪੋਰਟਲ ਰਾਹੀਂ ਭੁਗਤਾਨ ਕਰਨ ਵਿੱਚ ਆ ਰਹੀਆਂ ਮੁਸ਼ਕਿਲਾਂ ਦਾ ਹੱਲ ਕਰਨ ਲਈ ਨਕਦ ਖਰਚ ਕਰਨ ਦੀ ਲਿਮਟ ਤੈਅ ਕਰਨ ਦਾ ਸਰਕਾਰ ਨੂੰ ਸੁਝਾਅ ਭੇਜਣ ਦਾ ਫੈਸਲਾ ਕੀਤਾ ਗਿਆ।ਵੱਖ ਵੱਖ ਪ੍ਰੋਜੈਕਟਾਂ ਅਧੀਨ ਕੰਮ ਕਰਦੇ ਅਧਿਆਪਕਾਂ ਨੂੰ ਜਲਦ ਵਾਪਸ ਸਕੂਲਾਂ ਵਿੱਚ ਭੇਜਣ ਦੀ ਮੰਗ ਕੀਤੀ ਗਈ।ਸਿੱਖਿਆ ਵਿਭਾਗ ਵਿੱਚ ਪੈਦਾ ਹੋ ਰਹੀਆਂ ਸਮੂਹ ਸਮੱਸਿਆਵਾਂ ਦੇ ਹੱਲ ਲਈ ਪਿਛਲੇ ਸਮੇਂ ਵਿੱਚ ਸਿੱਖਿਆ ਅਤੇ ਅਧਿਆਪਕ ਵਿਰੋਧੀ ਕੀਤੀਆਂ ਸੋਧਾਂ ਨੂੰ ਰੱਦ ਕਰਕੇ ਪਹਿਲੇ ਨਿਯਮ ਬਹਾਲ ਕਰਨ ਲਈ ਤਰਕਸੰਗਤ ਵਿਚਾਰ ਵਟਾਂਦਰਾ ਕੀਤਾ ਗਿਆ। ਅਧਿਕਾਰੀਆਂ ਵਲੋਂ ਹਾਂ ਪੱਖੀ ਪਹੁੰਚ ਅਪਣਾਉਣ ਅਤੇ ਲੋੜੀਂਦੀ ਕਾਰਵਾਈ ਕਰਨ ਦਾ ਭਰੋਸਾ ਦਿੱਤਾ। 228 ਪੀ ਟੀ ਆਈ ਅਧਿਆਪਕਾਂ ਨੂੰ ਪਿਤਰੀ ਸਕੂਲਾਂ ਵਿੱਚ ਭੇਜਣ ਅਤੇ ਪ੍ਰਾਇਮਰੀ ਸਕੂਲਾਂ ਲਈ ਪੀ ਟੀ ਆਈ ਅਧਿਆਪਕ ਭਰਤੀ ਕਰਨ ਦੀ ਮੰਗ ਕੀਤੀ ਗਈ। ਓ ਡੀ ਐਲ ਅਧਿਆਪਕਾਂ ਨੂੰ ਰੈਗੂਲਰ ਕਰਨ ਸਬੰਧੀ ਅਦਾਲਤ ਵਿੱਚ ਮਾਮਲਾ ਹੋਣ ਦੀ ਜਾਣਕਾਰੀ ਦਿੱਤੀ ਗਈ। 5178 ਅਤੇ 8886 ਅਧਿਆਪਕਾਂ ਦੀ ਪਿਛਲੀ ਠੇਕਾ ਆਧਾਰਿਤ ਸੇਵਾ ਨੂੰ ਛੁੱਟੀਆਂ ਲਈ ਗਿਣਨ, 8886 ਅਧਿਆਪਕਾਂ ਦੀ ਸੀਨੀਆਰਤਾ 1.4.2018 ਤੋਂ ਮੈਰਿਟ ਅਨੁਸਾਰ ਬਣਾਉਣ ਲਈ ਹਮਦਰਦੀ ਪੂਰਵਕ ਵਿਚਾਰਨ ਦਾ ਭਰੋਸਾ ਦਿੱਤਾ।ਸਰਕਾਰ ਵਲੋਂ ਕੁਆਰਨਟਾਈਨ ਛੁੱਟੀ (ਕੋਰੋਨਾ ਛੁੱਟੀ) ਲਈ ਜਾਰੀ ਕੀਤੇ ਪੱਤਰ ਅਨੁਸਾਰ ਸਿੱਖਿਆ ਵਿਭਾਗ ਵਲੋਂ ਕਮਾਈ ਛੁੱਟੀ ਅਤੇ ਮੈਡੀਕਲ ਛੁੱਟੀ ਕੱਟਣ ਦੇ ਜਾਰੀ ਕੀਤੇ ਪੱਤਰ ਵਿੱਚ ਸੋਧ ਕਰਨ ਲਈ ਕਾਰਵਾਈ ਆਰੰਭੀ ਗਈ।ਪੰਜਵੀਂ ਅਤੇ ਅੱਠਵੀਂ ਦੇ ਵਿਦਿਆਰਥੀਆਂ ਦੀ ਰਜਿਸਟ੍ਰੇਸ਼ਨ ਸਬੰਧੀ ਜਾਰੀ ਨੋਟਿਸ ਰੱਦ ਕਰਨ ਕਰਨ ਲਈ ਬੋਰਡ ਨੂੰ ਜਵਾਬ ਦੇਣ ਦੀ ਜਾਣਕਾਰੀ ਦਿੱਤੀ ਗਈ।ਰਿਵਰਸ਼ਨ ਲੈਣ ਵਾਲੇ ਅਧਿਆਪਕਾਂ ਨੂੰ ਪਿਛਲੇ ਕਾਡਰ ਅਨੁਸਾਰ ਏ ਸੀ ਪੀ ਦਾ ਬਣਦਾ ਲਾਭ ਦੇਣ, ਸੀਨੀਅਰ / ਜੂਨੀਅਰ ਕੇਸਾਂ ਦਾ ਨਿਪਟਾਰਾ ਡੀ ਡੀ ਓ ਪੱਧਰ ‘ਤੇ ਦੇਣ ਦੀ ਮੰਗ ਕੀਤੀ ਗਈ।ਅਪਰ ਪ੍ਰਾਇਮਰੀ ਸਕੂਲਾਂ ਵਿੱਚ ਵਿਸ਼ਾਵਾਰ ਅਧਿਆਪਕ ਦੇਣ ਦੀ ਮੰਗ ਤੇ ਤਰਕਪੂਰਨ ਵਿਚਾਰ ਵਟਾਂਦਰਾ ਕੀਤਾ ਗਿਆ। ਮੋਰਚੇ ਨੇ ਵਿਦੇਸ਼ ਛੁੱਟੀ ਤੇ ਰੋਕ ਲਾਉਣ ਕਾਰਨ ਜੋਰਦਾਰ ਵਿਰੋਧ ਦਰਜ ਕਰਵਾਇਆ ਗਿਆ ਅਤੇ ਪੱਤਰ ਵਾਪਸ ਲੈਣ ਦੀ ਮੰਗ ਕੀਤੀ ਗਈ।ਪ੍ਰਾਇਮਰੀ ਕਾਡਰ ਦੀਆਂ ਪ੍ਰਮੋਸ਼ਨਾਂ ਨਾ ਕਰਨ, ਈ ਟੀ ਟੀ ਤੋਂ ਮਾਸਟਰ ਕਾਡਰ ਦੀਆਂ ਪ੍ਰਮੋਸ਼ਨਾਂ ਵਾਰ-ਵਾਰ ਲਟਕਾਉਣ ਤੇ ਮੋਰਚੇ ਵਲੋਂ ਜਥੇਬੰਦਕ ਐਕਸ਼ਨ ਕਰਨ ਦੀ ਚਿਤਾਵਨੀ ਦਾ ਸੁਨੇਹਾ ਡੀ ਪੀ ਆਈ (ਐ. ਸਿੱ.) ਤੱਕ ਪਹੁੰਚਾਉਣ ਲਈ ਕਿਹਾ ਗਿਆ।ਵਫਦ ਵਿੱਚ ਸੁਰਿੰਦਰ ਕੰਬੋਜ, ਸੁਖਵਿੰਦਰ ਸਿੰਘ ਚਾਹਲ, ਸੁਰਿੰਦਰ ਕੁਮਾਰ ਪੁਆਰੀ, ਜਸਵਿੰਦਰ ਸਿੰਘ ਔਲਖ, ਹਰਵਿੰਦਰ ਸਿੰਘ ਬਿਲਗਾ, ਹਰਜੀਤ ਸਿੰਘ ਜੁਨੇਜਾ, ਅਮਨਬੀਰ ਸਿੰਘ ਗੁਰਾਇਆ, ਸਤਨਾਮ ਸਿੰਘ ਰੰਧਾਵਾ, ਸੁਰਜੀਤ ਸਿੰਘ ਮੋਹਾਲੀ, ਨਵਪ੍ਰੀਤ ਬੱਲੀ, ਐਨ ਡੀ ਤਿਵਾੜੀ, ਕਰਨੈਲ ਦੌੜਕਾ,ਤਿਰਲੋਚਨ ਸਿੰਘ ਬਲਾਚੌਰ ਹਾਜ਼ਰ ਸਨ।

ਐਨ ਡੀ ਤਿਵਾੜੀ

ਸੰਪਰਕ ਨੰਬਰ 7973689591